0 قصة واقعية 5/5/2012

الخميس 03-05-2012 .. حوار بين شيماء وعلي وباسم ( 3 أخوات من أب وأم واحده )وهما قاعدين يتفرجوا ع التلفزيون

▪ شيماء (6 طب): عجبكم اللي حصل في العباسية !!!
▪ عـلي (3 هندسة): لا طبعا .. عشان ايه كل الدم ده
▪ باسم (محاسب ): يا جدعان .. هما ايه اللي وداهم عند الوزارة .. ميعتصموا في أي مكان تاني .. يروحوا ميدان التحرير ويبعدوا عن ولاد اللذينه دول
▪ علي : باسم .. ارحمني ! اللي قولي صحيح .. انت مع مطالبهم ولا لأ ؟
▪ باسم : ياعم والله مع كل حاجة بيقولوها ومؤمن بكل مطالبهم بس انا معترض علي انهم معتصمين قريب من الوزارة وخايف عليهم ..
▪ شيماء : حتي لو معترض علي مكان اعتصامهم دا ميخليش كل كلامك عن رأيك ده ومبتقولش اي حاجة علي الضرب والسحل اللي بيحصل
▪ باسم : يا جدعان هو فيه عاقل يرضي بالدم .. بس برضه يروحوا يعتصموا في أي مكان تاني ..
▪ علي : بقولك ايه .. انت حر .. عموماً أنا نازل بكره الجمعة 04/05/2012 وهروح مع اصحابي للعباسية وهبقي معاهم ..
▪ باسم : انت بتهرج .. لا طبعاً مش هتروح ومش هسيبك تروح .. عاوز تروح تعالا معايا ميدان التحرير ..
▪ علي : لا .. هروح العباسية .. عاوز تروح الميدان روح ..

حاول كل واحد يقنع التاني برأيه لكن كل واحد فشل ..

•• الجمعة 04-05-2012 .. صح أخونا ( باسم )وخد بعضه ع التحرير صلي الجمعة وقعد مع الشباب هناك يهتفوا ضد العسكر .. بعد شوية اتصل باخوه (علي) يطمن عليه

▪ باسم : عامل ايه ياد يا علي .. الدنيا تمام عندكم
▪ علي : كويس يا أخويا مش ناوي تجيلنا ..
▪ باسم : لا ياعم تعالوا انتو بقي ابوس ايديكم .. خايف حد يعمل اي حاجة والدنيا تبوظ
▪ علي : متخفش كل اللي هنا مطالبهم واحده ومحدش عاوز اي عنف ..
باسم : ماشي يا اخويا .. سلااام

شوية والدنيا قلبت والاعلام بيقول ان المتظاهرين حاولوا يقتحموا ..... الي اخره من اللي كلنا سمعناه وشوفناه .. اخونا (باسم) حاول يتصل بعلاء لكن دون اي رد .. ازداد قلقله وكل شوية يتصل لكن مفيش فايده ..
وفجأة .. لقي تلفونه بيرن ..رد بسرعة من غير ما يشوف مين اللي بيتصل

▪ باسم : ايوه يا علي .. طمني عليك ياد انت عامل ايه وفينك الوقتي ...
▪ شيماء : علي مين يابني .. تعالي هنا بسرعة محتاجين مساعدة بدل مانت قاعد عندك ..
▪ باسم : عندك فين !! .. ايه صوت الدوشة اللي حواليكي ده ؟؟
▪ شيماء : مش وقت استفسارات .. تعالي العباسية حالاً .. عشـــ ..
▪ باسم (مقاطعا) : انت ايه اللي وداك هناك الوقتي .. يخرب بيت شيطانك
▪ شيماء : مش وقته انا في المستشفي الميداني وفيه مصابيين كتير .. تعالي ضروري وكمان عشان تشوف اخوك ..

انقطع الاتصال .. و معرفش يكلم (شيماء) ولا (علي) تاني ..
قام جري وقال لمجموعة هناك تعالوا يا جدعان بسرعة .. فيه كذا كذا كذا .. مرحش معاه غير 2 والباقي رفضوا عشان متولعش الدنيا
علي موصل باسم كانت الدنيا ولعت اكتر والدم كتر ..... الخ

راح .. لقي مناظر تشيب الراس .. ومعرفش يوصل لا لعلي ولا لشيماء .. شوية وعرف ان اخوه علي مصاب اوي وفي المستشفي وأخته الشرطة العسكرية خدتها ( اعتقلوها بمعني أصح ) ..

▪ ▪ ▪ ▪ ▪ ▪ ▪ ▪ ▪ ▪ ▪ ▪ ▪ ▪ ▪ ▪ ▪ ▪ ▪ ▪ ▪ ▪ ▪ ▪ ▪ ▪ ▪ ▪ ▪ ▪ ▪ ▪ ▪ ▪

## يا تري لو حضرتك مكان (باسم) هتقول ايه :

هتقول يستاهلوا عشان مسمعوش كلامي وايه اللي جبهم هنا مع اني حذرتهم ... لو هتقول كده .. يبقي لا تعليق فقد مات قلبك :(

لو هتقول غير كده .. فكن علي يقين ان كتير من اخوانك الشباب والبنات حصلهم كده واكتر من كده امبارح .. فاقل حاجة تعملها : انك متتكلمش في حقهم الا بما هو حق واعطي كل حاجة حجمها .. متحاولش تعظم من خطأ اعتصامهم عند الوزارة (ان كنت تري ذلك ) .. وتصغر أو تلغي كارثة السحل والضرب والقتل والعدوان اللي حصل عليهم من أشباه الرجال المنتمين للعسكر

(شـ)ــيماء و (عــ)ـلي و (بــ)ــاســم ... شعب واحد
▪ ▪ ▪ ▪ ▪ ▪ ▪ ▪ ▪ ▪ ▪ ▪ ▪ ▪ ▪ ▪ ▪ ▪ ▪ ▪ ▪ ▪ ▪ ▪ ▪ ▪ ▪ ▪ ▪ ▪ ▪ ▪ ▪ ▪

تابع القراءة